khwaish

Aksar do log kahin na kahin mila karte hai, phir baatein karte hai.Milte hai roz aur jaante hai pehchante hai ek-dusre ko. Din be din baton me hansi aur dosti hone ke sath coffe shaamil ho jaati hai. Aur waqt beetata hai aur phir jaise ek dusre ka sath jaruri sa lagne lagta hai, yeh sab koi soch kar nahi karta hai bas ho jata hai. Phir wohi mulkaaton ka silsila badhte badhte zindagi ko mohabbat ke pankh laga deta hai aur insaan parinda bankar udna shruru kar deta hai. Aur parinda ka yeh joda ghonsle me sath rehte hue bohat se sapnay dekhne aur jeene lagta hai aur dekhe bhi kyu naa janab. Zindagi me sapnay dekhne ka haqq toh sabhi ko hai aur pyaar me bane sabhi parindo ki shurwat toh kuch issi tarike se hoti hai.Jab ek dusre ka sath acha lagta hai, jab kisi ka naaraz hona jaayaz lagta hai, jab uski khushi ke liye kuch bhi kerna gawra lagta hai, dost,dunia sab baad me aane lagte hain.Iss waqt tak koi bhi apni zindagi se shikayat nahi karta aur mann hi mann khush ho kar bhagwan ka shukriya ada karta hai aisa sath dene ka. Khair yeh waqt hai badalta toh hai hi aur waqt ka pahiya ghumta hai toh jaruratein bhi badal jaati hai aur jab jaruratein badlegi toh dikkat toh hogi. Yahi toh life ka rule hai janab jo iss waqt me khud ko sambhal aur samjha le woh hamesha udta rehta hai nahi toh na joda rehta hai aur na udd sakte ho.Waqt aur jaruratein badalne ke sath agar insaan khud ko badal le aur ek dusre ko samaj le jeena shayad thoda aasan ho jaayega par jab aisa hota nahi hai toh wohi sath kachotne lagta hai, wohi baatein chidhchidha bana deti hai, wohi naaraz hona aur usse manana ek formality si lagti hai.

 Ek-dusre ke liye kuch karke khushi nahi mehsus hoti hai, zindagi ke aise mod par aakar insaan iss soch me pad jaata hai ki woh jaaye kidhar aage kuch dikh nahi raha aur piche kuch bacha nahi. Khud ko aaene me dekhkar maalum hota hai ki usse apne aapke ke badal jaane se kitni shikayat hai, mann me chalti kashmaskash usse alag hone par majbur kar deti hai aur yeh alag hona usse gwara nahi hai par iske alawa aur koi raasta bhi toh nahi. Aur aakhir me jab insaan apni zindagi ke kuch panne palat kar dekhta hai toh ek hi sawaal mann me ubhar kar aata hai aisa hua kyu aur shayad jiska jawab usse pata hota hai.Issi tarah do log aksar ek-dusre se juda ho jaate hai aur mann me khwaish rah jaati hai dubra naa udne ki...!!